कृष्णकमळ

शोभे पाठीस दश अवतारी,
पार्श्वभू  पाकळ्यांची ।
डोई टोपी शुभ्र मिरवते,
कौरवी त्या दळांची ॥
छत्री शोभे बहरत वरी,
पांडवांच्या तुर्‍यांची ।
डौले डोले कलश, त्यावरी,
देखणी रे त्रिमूर्ती ॥

कृष्णकमळाचे फूल हे ईश्वरी सृजनाचे एक अनोखे कौतुक आहे. उत्तम भूमितीय संरचना. देखणे रंगाविष्कार. मध्य कळ्याला खुडल्यावर उघडणार्‍या, सुघटित कुंभातील, सुमधुर मध. शिवाय दूरवर दरवळत असलेला मंद सौरभ. यापरता मानवी मनास मोहवणारे, खरे तर खुळावणारे, दुसरे फूल असू तरी शकेल काय? त्याच फुलाचे हे सुंदर प्रकाशचित्र चित्रित केले आहे मायबोलीवरील व्यक्तिरेखा अवल उपाख्य आरती खोपकर ह्यांनी.

त्यांनी मायबोली डॉट कॉम वर लिहिलेल्या “कृष्णकमळ” ह्या लेखातील हे चित्र इथे पुन्हा प्रकाशित केले आहे. व्यवसायाने इतिहास अध्यापन करत असलेल्या अवल, उपजत कलाकार असून त्यांना अनेक कलांत रुची आणि गती आहे. मायबोलीवरील त्यांचे लेखन, तसेच खालील त्यांच्या अनुदिनीही ह्याची साक्ष पटवतील.

१. कलेची अनुदिनी http://arati21.blogspot.in/
२. कवितांची अनुदिनी http://mayurapankhi.blogspot.in/
३. प्रकाशचित्रांची आणि संजीवित‌-चलचित्रांची अनुदिनी http://chitrarati.blogspot.in/
४. इतिहासावरील लिखाणाची अनुदिनी http://www.goshtamanasachi.blogspot.in/
५. पाककलेची अनुदिनी http://rasanaarati.blogspot.in/
६. आईची अनुदिनी http://www.rekhachitre.blogspot.in/
७. बाबांची अनुदिनी http://www.sureshchitre.blogspot.in/

ह्या चित्राच्या पुनः प्रकाशनास अनुमती दिल्याखातर त्यांना मनःपूर्वक धन्यवाद! तसेच त्यांच्या सर्व भावी सृजनास हार्दिक शुभेच्छा!